Dydd Iau, 21 Gorffennaf.
Fis diwethaf, ymwelodd clwstwr Addurniadol y rhwydwaith RPCI â chynhyrchydd stoc meithrinfa wydn o Swydd Gaerwrangon, Bransford Webbs. Dan arweiniad ymgynghorydd ADAS a staff allweddol y feithrinfa, galluogodd yr ymweliad i fynychwyr fod yn dyst i egwyddorion a gweithrediad ymarferol RPCI ar feithrinfa fasnachol fawr.
Dangosodd yr ymweliad astudio hwn, er gwaethaf y gostyngiadau yn argaeledd cynhyrchion diogelu planhigion confensiynol (e.e., pryfleiddiaid a ffwngleiddiaid) yn ystod y blynyddoedd diwethaf, fod cnydau o ansawdd da yn dal i allu cael eu cynhyrchu. Mae rheolaethau diwylliannol, rheolaethau biolegol a Bioddiogelwyr yn cael eu defnyddio’n llwyddiannus iawn fel llinell amddiffyn gyntaf yn Bransford Webbs, ac maent yn gweithio’n dda’n gyffredinol i atal plâu a chlefydau rhag dod yn broblem. O ganlyniad, mae canran sylweddol o wariant meithrinfeydd ar ddiogelu cnydau yn cael ei roi tuag at reolaethau biolegol a bioddiogelwyr y dyddiau hyn.
Mae’r pynciau a gafodd eu trafod yn cynnwys:
- Cynhyrchu cnydau yn yr amgylchedd mwyaf priodol (e.e., mae rhai leinwyr yn perfformio’n llawer gwell dan dwneli / tu allan nag o dan wydr, yn enwedig yn yr haf) sydd wedi helpu i leihau problemau a cholledion. Monitro cnydau, ataliad a rheolaeth o blâu a chlefydau.
- Sicrhau bod dŵr dyfrhau sy’n cael ei dynnu o afonydd yn cael ei reoli a’i drin er mwyn rheoli pathogenau sy’n cael eu cludo gan ddŵr, megis Phytophthora cyn defnyddio dŵr ar gyfer dyfrhau.
- Archwiliadau iechyd ar blanhigion sydd wedi’u prynu i mewn er mwyn adnabod unrhyw blâu neu glefydau ar blanhigion ifanc sydd wedi’u prynu i mewn. Mae adnabyddiaeth gynnar o’r rhain yn helpu i sicrhau bod rheolaethau’n gallu cael eu gweithredu’n gyflym cyn i broblemau ledaenu o fewn y feithrinfa.
- Rheolaethau biolegol, gan ganolbwyntio ar blâu allweddol yr haf megis thripiau; awtomatiaeth o gymhwyso ysglyfaethwr, treialon gan ddefnyddio gwahanol widdon ysglyfaethus, monitro poblogaethau o blâu ac ysglyfaethwyr i gael rheolaeth drwy gymwysiadau cywirol rhagweithiol lle bo angen. Mewn rhai achosion, mae cymwysiadau cywirol o blaladdwyr confensiynol yn ofynnol.
- Y defnydd o gronfeydd data sgileffeithiau sydd ar gael ar wefannau’r prif gyflenwyr rheolaeth fiolegol i fesur effaith cymhwyso pladdalwyr ar reolaethau biolegol fel cymorth i wneud penderfyniadau.
- Y defnydd o flodau gwyllt rhwng tai gwydr yn lle gwair wedi’i dorri; gan arwain at niferoedd cynyddol o ysglyfaethwyr sy’n dod yn naturiol megis pryfed hofran o fewn cnydau cyfagos.
- Y trawsnewidiad i gyfryngau llai o fawn / heb fawn a’r rheolaeth o gymysgeddau llai o fawn a di-fawn i gael y canlyniadau gorau.
- Y defnydd o fioddiogelwyr allweddol megis Serenade ASO, Fytosave, AmyloX and Romeo i helpu atal clefydau dail a lleihau dibyniaeth ar ffwngleiddiaid confensiynol awdurdodedig sy’n weddill.
Cafodd rhwydwaith Addurniadol RPCI Tyfu Cymru ei sefydlu i helpu i hyfforddi a chefnogi’r rheiny sydd eisiau cynyddu eu defnydd o Fioddiogelwyr. Rhannodd y grŵp eu profiadau o ddull integredig gyda’r tyfwyr cynhaliol a oedd yn annog dysgu rhwng cyfoedion.